Finska najsrećnija zemlja na svijetu
Finska je, uprkos pandemiji koronavirusa, odbranila titulu najsrećnije države na svijetu i zauzima prvo mjesto UN-ove liste četvrtu godinu zaredom, a Crna Gora je 72. među 149 zemalja, objavljeno je danas uoči Svjetskog dana sreće.
Za autore to nije “nikakvo iznenađenje” i ističu da je Finska “uvijek bila vrlo visoko plasirana na osnovu mjera međusobnog povjerenja koje su pomogle da se zaštite životi i egzistencije u vrijeme pandemije”, prenosi portal SEEbiz.
Finsku vodi premijerka Sanna Marin i ta je zemlja jedna od 23 država obuhvaćenih istraživanjem kojima upravlja žena.
Finci su “nastojali uskladiti politiku sa opštim osjećajem blagostanja”, navode autori.
Ljestvica sreće zasniva se na statističkim podacima Galupovog istraživanja o tome koliko se sami građani osjećaju srećnima.
Indeks sreće zasniva se na faktorima kao što su BDP po glavi stanovnika, očekivani životni vijek građana, slobode, percepcija korupcije u vladi i privrednim subjektima.
Kao i obično vrh liste zauzimaju zemlje evropskog sjevera, pa Finsku slijede Danska, Švajcarska, Island, Holandija, Norveška, Švedska, Luksemburg, te Novi Zeland izvan Evrope, a na 10. mjestu je Austrija.
Hrvatska je zauzela 60. mjesto sa ocjenom 5.882, a u njenom susjedstvu među zemljama bivše Jugoslavije slabije su Bosna i Hercegovina na 64. mjestu, Crna Gora na 72. te Makedonija na 94. mjestu. Daleko bolje su rangirane Slovenija na 29. mjestu i Srbija na 48. mjestu.
Sjedinjene Američke Države svrstane su na 20. mjesto, Rusija je na 77, Kina 85, a Indija na 140. mjestu.
