SAD: Prihodi top 500 kompanija iznad 12 biliona dolara

Tesla Motors, uz još 19 kompanija, prvi put se našla na godišnjoj listi 500 vodećih američkih kompanija po prihodima koju sastavlja američki časopis Fortune

Od tih 20 novih kompanija, šest ih je nastalo nedavnom diobom ili izdvajanjem poslovanja, tri su osnovane prije više od 100 godina, dok su dvije osnovane tek prošle godine.

Start-up Elona Maska za električne automobile na listi je zauzeo 383. mjesto, nakon što je povećao prodaju za 73 posto u prošloj godini.

Tesla je „teža“ od Dženeral Motorsa i Forda po tržišnoj vrijednosti, ali i dalje ostvaruje daleko manje prihode od tradicionalnih automobilskih proizvođača.

Valmart je na vrhu liste 500 vodećih magazina Fortune. Maloprodajni gigant drži vodeću poziciju pet godina zaredom. Berkšir Hatevej, kompanija poznatog investitora Varena Bafeta je na drugom, a Epl na trećem mjestu.

Sa ovogodišnje liste ispalo je 15 kompanija. Ove godine kriterijum je bio minimalni godišnji prihod od 5,1 milijarde dolara. A ove godine ukupni prihodi svih 500 kompanija s liste dostižu 12.100 milijardi dolara, što je 65 posto američkog bruto domaćeg proizvoda (BDP).