Drejk osvojio čak 13 nagrada Bilbord, oboren rekord Adel

Reper Drejk osvojio je čak 13 muzičkih nagrada Bilbord na ceremoniji dodjele u Las Vegasu, i tako oborio rekord britanske pjevačice Adel koja je imala 12 nagrada

Drejk je imao 22 nominacije, a među priznanjima koja je osvojio su nagrade za najboljeg izvođača, najboljeg muškog izvođača i nagradu za najboljeg na „Bilbord listi 200“. Nagradu je Drejku uručio najstariji sin Majkla Džeksona, Prins Džekson.

Nagrada „Bilbord ikone“ ove godine dodijeljena je Šer koja je tokom večeri izvela dvije numere, „Believe“ i „If I Could Turn Back Time“. Još jedna zvijezda večeri bila je Selin Dion koja je izvela Oskarom nagrađenu numeru iz filma „Titanik“, koji ove godine slavi jubilarnih 20 godina otkako je snimljen. Za najboljeg ženskog izvođača proglašena je Bijonse, najbolji rok sastav bio je „Twenty One Pilots“, a najbolju turneju je prema Bilbordu imao „Coldplay“.

Muzičke nagrade Bilbord dodjeljuje istoimeni američki muzički časopis koji dobitnike, za razliku od Gremija, određuje prema prodaji albuma. Za nagrade Gremi je zadužen žiri.