Američke zalihe nafte zadržale cijene ispod 52 dolara
Cijene nafte zadržale su se u srijedu na međunarodnim tržištima ispod nivoa od 52 dolara, zakočene podatkom o rastu američkih zaliha koji potpiruje sumnju u uspjeh nastojanja OPEC-a da smanji jaz između ponude i potražnje
Na londonskom tržištu je cijena barela nakon podneva ostala gotovo nepromjenjena u odnosu na prethodno zatvaranje i iznosila je 51,84 dolara. Značajnijih promjena nije bilo ni na američkom tržištu gdje se barelom trgovalo po 49,32 dolara.
Raspoloženje na tržištima prigušio je izvještaj Američkog instituta za naftu (API), koje je pokazalo rast zaliha sirove nafte u prošloj nedjelji za 897.000 barela. Analitičari su očekivali njihov pad za 1,7 miliona barela. Značajno su porasle i zalihe benzina, što je neuobičajeno za ovo doba godine.
– Budu li podaci američke vlade na istom tragu, to će opravdati raširenu zabrinutost zbog tvrdokorno visokih zaliha nafte u članicama Organizacije za ekonomsku saradnju i razvoj (OECD) i signalizovati zastoj u globalnom procesu smanjivanja jaza između ponude i potražnje, upozoravaju analitičari savjetodavne kompanije PVM.
Protivtežu američkim podacima pružila je izjava saudijskog ministra energetike Khalida al-Faliha da je zainteresovan za razgovore OPEC-a i nezavisnih proizvođača o stabilizaciji cijena. Te su dvije grupe obećale smanjiti proizvodnju za 1,8 miliona barela dnevno u prvoj polovini godine, a pojedine su zemlje naznačile da bi mogle nastaviti smanjivati proizvodnju i u drugoj polovini godine. Ta će tema biti na dnevnom redu OPEC-ova majskog sastanka.
Odvojeno je OPEC danas izvijestio da je cijena barela referentne korpe njegove nafte u utorak iznosila 49,21 dolar, što znači da je bila 43 centa niža nego prethodnog dana trgovanja.
