Šef Dojče telekoma protiv prodaje državnog udjela

Tržište

Šef Dojče telekoma Timotojs Hetges usprotivio se danas idejama da njemačka država proda svoj udio u toj firmi.

On je upozorio na rizike izlaska njemačke države iz vlasničke strukture te njemačke kompanije

Ko predlaže da država iz tog vlasništva izadje „trebalo bi da se zapita ko bi eventualno umjesto nje ušao“ i da li bi novi vlasnik imao interesa za bezbjednost infrastrukture i investicije u Njemačkoj, prenosi nedoumice Hetgesa Frankfurter algemajne cajtung.

Njemačka država je pojedinačno najveći akcionar Dojče telekoma. Ona posjeduje 32% akcija čija se vrijednost procjenjuje na 24 milijarde eura.

Tokom aktuelnih pregovora o budućoj koaliciji CDU, CSU, FDP, Zeleni, nazvanoj Jamajka koalicija, iznijet je predlog da njemačka država proda svoje udjele u kompanijama i da se time finansira jačanje širokopojasnog Interneta i optičke mreže kao i smanjenje poreza. Zagovornici ove ideje su njemački liberali i zeleni dok je CDU/CSU podijeljena.

Njemačka država ima udjele i u Njemačkoj pošti i Komerc banci.

Dojče telekom je postao vlasnik mnogih telekomunikacionih preduzeća u našem regionu, pri čemu su pitanja poput ovih Hetgesovih, neuspješno postavljana. Dojče telekom nije učestvovao u neuspješnim pokušajima prodaje Telekoma Slovenija i Telekoma Srbija, mada se o njegovom interesu mnogo spekulisalo.

Od 2014. godine njemački budžet nije pravio nove dugove i sa novim dugovima se ne računa ni u realizaciji koalicionog sporazuma čije je definisanje u toku.